The lyric art form of Urdu poetry — every sher a universe of longing, love, and philosophy
"khushi ke vaqt bhi tujh ko malaal kaisaa hai uruj-e-husn mein naqs-e-kamaal kaisaa hai jo ek duuje ko chaahein to kyuun na apnaa lein ye dil se puchh ke batlaa khayaal kaisaa hai nahin jo aane ke sab un ki raah takte hain ye intizaar kaa shahr-e-vabaal kaisaa hai hai jis ke saath juDe ik hazaar ik khadshe vo hijr kaisaa hai 'haamid' visaal kaisaa hai"
"biphri lahrein raat andheri aur balaa ki aandhi hai girdaabon ne bhi gheraa hai naav bhi TuTi-phuTi hai kis ne rakh Daale angaare dil si shaakh ki aankhon par vo kyuun bhulaa ye khushiyon ke phuul khilaane vaali hai jis ko teraa saath milaa vo khush na rahe kyuun phulon saa teraa to chhu lenaa tak bhi hijr ke rog mein shaafi hai had mein ho to pyaar hai achchhaa varna ye bhi zahmat hai jaise ik chingaari bhaDke to jangal par bhaari hai"
"diye ki lau se na jal jaae tirgi shab ki ki din ki qadr kaa baais hai har ghaDi shab ki jo dil-kharaash hain kuchh lamhe din ke lamhon mein to dil-faroz bhi hain saaatein kai shab ki kahaan ke khvaab mire aur kahaan ki taabirein mujhe to sone na de ab sahar-gari shab ki jo vo nahin hai to kuchh bhi nahin hai phir 'haamid' abas hain chaand ke bin raunaqein sabhi shab ki"
"shaam se milne gayaa to raat ne Thahraa liyaa jaane kaise chaand ne suraj ko bhi bahkaa liyaa ham ne chup kyaa saadh li har shakhs ki har baat par phir huaa jitnaa bhi jis se us ne bas taDpaa liyaa maanaa ik uljhe hue resham saa ham mein rabt thaa jab sulajh paayaa na thaa to aur kyuun uljhaa liyaa kuchh ne li hai hukmaraani aur vilaayat kuchh ne li ham ne 'haamid' tum ko paane vaalaa bas kaasa liyaa"
"khush-bakht hain aazaad hain jo apne sukhan mein khush-bakht hain jo qaid hai neki ke chalan mein is aankh ne kyaa hotaa huaa dekh liyaa hai bhaunchaal saa barpaa hai ajab mere badan mein jo kaam karo jab bhi karo Duub ke us mein har ek tahayyur hai junun-zaad lagan mein ghammaaz to kuchh hotaa hai aadaat kaa chehra suraj kaa tasavvur bhi to hotaa hai kiran mein"
"kyaa kyaa dhare ajube hain shahr-e-khayaal mein biite khushi se din to kaTe shab malaal mein shaayad ki shab ki tah mein hai suraj chhupaa huaa shab lag rahi hai khoi si din ke jamaal mein koi kare na ghaur to us kaa qusur hai ik ik javaab varna hai ik ik savaal mein kuchh miltaa-jultaa aks bujhaati to hai magar kab hu-ba-hu samaayaa hai koi misaal mein"
"agar tu saath chal paDtaa safar aasaan ho jaataa khushi se umr bhar jiine kaa ik saamaan ho jaataa na jaa kar kyuun jataataa hai jo jaanaa thaa chalaa jaataa bahut hotaa to ye hotaa ki main hairaan ho jaataa jo meri samt tu do gaam bhi hans kar chalaa aataa main tere aur tu mere liye imaan ho jaataa khushi se mujh pe kyaa jaane guzar jaani thi phir 'haamid' ghaDi pal ko bhi tu mujh par jo kuchh qurbaan ho jaataa"
"bhaDak uThaa hai alaav tumhaari furqat kaa nahin hai tum pe asar phir bhi kyuun mohabbat kaa maaani hi to nahin kyaa badal gae us ke vafaa ko naam jo dete ho tum aziyyat kaa tumhi bataao mire hoge aur kaise tum ilaaj-e-ijz bhi niklaa nahin raunat kaa kisi ko paa liyaa tum ne to chhoD kar mujh ko koi ilaaj to kar do miri bhi hasrat kaa"
