Ghazal

"main ruuTh gayaa huun vo manaane pe lagaa hai ye tiir miraa Thiik nishaane pe lagaa hai ik zakhm-e-judaai tire jaane pe lagaa thaa ik zakhm-e-judaai tire aane pe lagaa hai jo vaqt guzarnaa thaa tiri yaad mein apnaa kyaa dukh hai ki vo vaqt zamaane pe lagaa hai ye kaar-e-ziyaan hai ise ab kaun bataae jo khvaab ko taabir banaane pe lagaa hai lagtaa hai ki ab lauT ke aanaa hi paDegaa koi mujhe aavaaz lagaane pe lagaa hai"

"darun-e-zaat aziyyat thi aur tum nahin the mujhe tumhaari zarurat thi aur tum nahin the main khvaab mein tumhein yak-lakht chhune vaalaa thaa phir us ke baad haqiqat thi aur tum nahin the isi liye to mohabbat ko fauqiyat di hai ki mere saath mohabbat thi aur tum nahin the main chaah kar bhi dar aataa na thaa khayaalon mein magar tumhein ye suhulat thi aur tum nahin the guzarne vaalaa nahin thaa magar guzaar liyaa vo din ki jab hamein fursat thi aur tum nahin the"

"vo khvaabon ke aazaar jhele magar baar-e-duniyaa na jhele jo dukh main ne jhele hain allah kare meraa beTaa na jhele duaa hai ki ham-ruh mil jaae har ek ko apnaa apnaa agar jhelnaa bhi paDe koi gham to akelaa na jhele tamaashaa banaane se pahle tumhein ilm thaa dil ke baare ki tanhaai to jhel legaa magar ye tamaashaa na jhele tum aao agar dekhne ke liye apne vahshi ki haalat to pathraai aankhon se bas dekhnaa ye dilaasaa na jhele koi aaine ke chaTakhne pe is darja hairaan kyon ho vo jaadui partav bhalaa kis tarah koi aaina jhele"

"tund maujon kaa kinaara honaa kitnaa mushkil hai tumhaaraa honaa teri yaadon kaa bhi aanaa kam-kam tang-dasti mein guzaaraa honaa raaegaani mein jiye hain ham log jis tarah subh kaa taaraa honaa teri mahfil mein hain maujud magar kaun dekhegaa hamaaraa honaa kaash hon harf-e-mukarrar vo log kaash mumkin ho dobaara honaa"

"hui aabaad viraani hamaari koi samjhe pareshaani hamaari azal ko vaqt hi kitnaa huaa hai chali jaaegi hairaani hamaari use ham se gurezaan hi na kar de ye is darja faraavaani hamaari tumhaari khush-libaasi ke muqaabil jo aae chaak-daamaani hamaari ghazal ko jiine vaale jaante hain bahut mushkil hai aasaani hamaari"

"shikasta muzmahil rakkhaa huaa hai mohabbat ne khajil rakkhaa huaa hai tujhe to maan rakhnaa thaa hamaaraa magar tu ne bhi dil rakkhaa huaa hai agar daaim nahin hotaa hai kuchh bhi to gham kyon mustaqil rakkhaa huaa hai kisi ne chaand rakkhaa hai falak par tire chehre pe til rakkhaa huaa hai karam us kaa ki mujh se bad-gumaan ko yaqin se muttasil rakkhaa huaa hai"

"pahunch kaa masala hal kar rahaa huun main darvaaza muqaffal kar rahaa huun agar milnaa nahin tum ne kahin bhi main apne paanv kyon shal kar rahaa huun sitaare laa rahaa huun aasmaan se murattab teri paael kar rahaa huun tumhaari yaad dariyaa burd kar ke adhuraa-pan mukammal kar rahaa huun vo dil mein aa basegaa dekh lenaa jise aankhon se ojhal kar rahaa huun"

"azal ki ibtidaa hone se pahle kahaan thaa tu miraa hone se pahle ye asraar-e-zamaan khulte nahin the hamaaraa masala hone se pahle mire dil mein sukunat kar rahi thi mohabbat jaa-ba-jaa hone se pahle adaa kar hi liyaa ham ne bil-aakhir vo ik sajda qazaa hone se pahle vo lamha jo guzaaraa hai tire saath puraanaa thaa nayaa hone se pahle"

"ye kaisi raat hai jis kaa sitaara koi nahin tumhaare hote hue bhi hamaaraa koi nahin dar-e-vajud pe dastak hui to puchhaa kaun phir ek shakhs darun se pukaaraa koi nahin vo chand lamhe jo tum saunp kar chale gae the vahin pe rakkhe hue hain guzaaraa koi nahin tiri nigaah nae raaste bataati hai hamaare vaaste lekin ishaara koi nahin"