Ghazal

"to kyaa huaa jo mire saath aaj tu nahin hai faqat yahi ki hai viraani haav-hu nahin hai tumhaare saath jo ik roz meri baat na ho to yuun lage ki kisi se bhi guftugu nahin hai ye zakhm-e-dil ki numaaish nahin tamaashaa-garo dar-asl baat ye hai pairahan rafu nahin hai kisi ne dekhaa nahin ham ne jaise dekhaa use ghalat kahaa hai kisi ne vo khub-ru nahin hai abhi abhi jo mujhe tujh pe pyaar aa rahaa hai khudaa kaa shukr adaa kar tu ru-ba-ru nahin hai main aap apnaa mukhaalif main aap apnaa harif mire alaava miraa koi bhi adu nahin hai"

"lagaa liyaa thaa dil ko ek sil ke saath so ji rahaa huun dard-e-mustaqil ke saath sab apni apni jannaton mein kho gae kise paDi nibhaataa mujh khajil ke saath main jis taraf thaa jaan ki amaan na thi vo ho gayaa hujum-e-mushtail ke saath uDaan bhar rahaa thaa vo khalaaon ki hamaaraa raabta thaa aab-o-gil ke saath be-itminaan ho gayaa tiraa asiir ye kyaa kiyaa hai tu ne mere dil ke saath phir us ke zikr ne rulaa diyaa 'zaki' hai chheD-chhaaD zakhm-e-mundamil ke saath"

"ghazal ko gardish-e-ayyaam se nikaalte hain use na hone ke ibhaam se nikaalte hain ye log kyuun tiri takzib karte hain jabki hazaar kaam tire naam se nikaalte hain ye sher hain hamein khairaat mein nahin milte kabhi dhuein se kabhi jaam se nikaalte hain tujhe khabar hi nahin hai ki ham visaal ki faal kabhi sahar se kabhi shaam se nikaalte hain khudaayaa dasht-e-safar khatm kyuun nahin hotaa suraagh-e-raah to har gaam se nikaalte hain ab intizaar yahi hai ki kab hamaare imaam hamein musibat-o-aalaam se nikaalte hain kuchh aur kaamon mein dil ko lagaa ke dekhein 'zaki' ise tilism-e-shafaq-faam se nikaalte hain"

"jaati nahin hai us ki mahak tak lihaaf se aai thi ek baar pari koh-e-qaaf se aankhon mein raushni kaa samundar umaD paDaa jaise hi us badan ko nikaalaa ghilaaf se tujh ko kabhi bhi meri zarurat nahin rahi maayus ho gayaa huun main is inkishaaf se tujh se hamein shadid mohabbat hai is liye karte hain ittifaaq tire ikhtilaaf se ye soch kar bhi chhat ki marammat na ki 'zaki' taaza havaa to aati rahegi shigaaf se"

"jab hamaare khilaaf bolte hain sab hamaare khilaaf bolte hain ham to the mutmain ki ye ahbaab kab hamaare khilaaf bolte hain bolte hain jab un ke haq mein ham tab hamaare khilaaf bolte hain pahle ham se unhein mohabbat thi ab hamaare khilaaf bolte hain dil hamaare liye dhaDaktaa hai lab hamaare khilaaf bolte hain"

"guzaarne ko to sab zindagi guzaarte hain ham ahl-e-ishq ajab zindagi guzaarte hain fareb khaate chale jaa rahe hain duniyaa se koi saliqa na Dhab zindagi guzaarte hain vo chand roz jo achchhe dinon se hain mausum na tab guzaari na ab zindagi guzaarte hain jinhein qubul nahin lamha bhar ki ham-safari hamaare saath vo kab zindagi guzaarte hain bhaTak rahe hain kisi dasht-e-be-karaan mein magar ik aarzu ke sabab zindagi guzaarte hain"

"khafaa hain is liye vo ham se farmaaish nahin karte so ham bhi dhuup aur saae ki paimaaish nahin karte zamaana har chamakti chiiz ko sonaa samajhtaa hai hamaaraa masala ye hai ki aaraaish nahin karte zarurat aashkaaraa karti hai naam-o-nasab sab kaa vagarna jo hasin hote hain zebaaish nahin karte utar sakti nahin dil-aaine mein raushni jab tak ham us se saaf saari gard-o-aalaaish nahin karte zaki har ek khvaahish ki chukaanaa paDti hai qimat talab ham is liye ab us se aasaaish nahin karte"

"tu milaa to mujhe yaqin aayaa main yahaan be-sabab nahin aayaa mujh se tujh mein kashish ziyaada thi is liye main tire qarin aayaa jaane dariyaa ke paar kyaa hai ki jo muskuraataa gayaa hazin aayaa jahaan aanaa na chaahiye thaa kabhi dil siyah-bakht thaa vahin aayaa qabr hai yaa black-hole koi jo gayaa lauT kar nahin aayaa jhuum uThe hain sabhi sitaare 'zaki' kahkashaan mein koi makin aayaa"

"bar-sar-e-rozgaar the ham to 'jaun' yaaron ke yaar the ham to chal diye dost to ye dhyaan aayaa sirf ik rahguzaar the ham to ab ghulaamon ke bhi ghulaam hue saahab-e-iqtidaar the ham to khul ke roe hain to yaqin aayaa vaaqai jaan-daar the ham to jab gire TuuT kar to ye dekhaa chaar su be-shumaar the ham to hamein Thukraa diyaa gayaa hai 'zaki' rukh-e-parvardigaar the ham to"

"main udaas huun mire mehrbaan main udaas huun tu kahin nahin hai tu hai kahaan main udaas huun miraa shahr-e-khvaab to reza reza bikhar chukaa kahin kho gai miri kahkashaan main udaas huun mujhe apne qadmon ki khaak mein hi panaah de mere paas kuchh bhi nahin hai maan main udaas huun ye jo jang hai kisi aur vaqt pe Taal dein saf-e-dostaan saf-e-dushmanaan main udaas huun tumhein umr bhar kaa hai tajraba koi mashvara koi mashvara ai shikastagaan main udaas huun main ajiib huun nahin mukhtalif haan ajiib huun vahaan saaraa shahr hai khush jahaan main udaas huun"