Ghazal

kiye hain mujh pe jo ehsaan jataa nahin saktaa

vo shakhs to miraa dil bhi dikhaa nahin saktaa

chhupaa huaa huun tah-e-sang ek muddat se

havaa kaa jhonkaa miri samt aa nahin saktaa

· · ·

aa gayaa isaar mere halqa-e-ahbaab mein

phir kisi sho'le ne paai hai numu barfaab mein

kah rahi hai saahilon se Dubne vaale ki laash

main ne paayaa hai sukun ik muztarib girdaab mein

· · ·

naved-e-yaum-e-bahaaraan khizaan se zaahir ho

misaal-e-saut-e-pareshaan fughaan se zaahir ho

tujhe gumaan hai agar khud pe lafz-e-raushan kaa

ridaa-e-shabnam-e-ijz-e-bayaan se zaahir ho

· · ·

be-niyaaz-e-saut-o-mahrum-e-bayaan rakkhaa gayaa

yaani harf-e-shauq ko zer-e-zabaan rakkhaa gayaa

khvaab mein rakkhi gai buniyaad-e-shahr-e-aarzu

qaid mein barfaab ki shoala javaan rakkhaa gayaa

· · ·

kis dil se ham iraada-e-tark-e-junun karein

mumkin nahin ki khvaahish-e-sahraa kaa khuun karein

kuchh guftugu ho aaj urus-e-bahaar se

kuchh ham khizaan-rasida bhi haasil sakun karein

· · ·

huun main bhi shoabada koi duniyaa ke saamne

hairaan ho rahi hai mujhe paa ke saamne

zarre ne aaj apni haqiqat ko paa liyaa

zarra na sar-nigun huaa sahraa ke saamne

· · ·

raushni ko tirgi kaa qahr ban kar le gayaa

aankh mein mahfuz the jitne bhi manzar le gayaa

ajnabi saa lag rahaa huun aaj apne aap ko

aaine ke saamne main kis kaa paikar le gayaa

· · ·

har ek shai ki haqiqat se baa-khabar dekhun

main apni khaak mein pinhaan tujhe bhi gar dekhun

ye kyaa ki haat baDhaaun to sang-reze milein

kahin to main bhi damakte hue guhar dekhun

· · ·

sadaa-e-ahd-e-vafaa ko zavaal kyuun aayaa

lab-e-sukut pe harf-e-savaal kyuun aayaa

kise khabar ki chaman mein khizaan ki aamad par

ghurur-e-shoala-e-gul ko jalaal kyuun aayaa

· · ·

phulon se hogi dhuul judaa dekhte raho

manzar nikhaar degi havaa dekhte raho

laaegi rang laghzish-e-paa dekhte raho

manzil bhi degi apnaa pataa dekhte raho

· · ·