Ghazal

"har nai shaam ye ehsaas huaa ho goyaa meraa saaya mire paikar se baDaa ho goyaa tere lahje mein to thi hi tiri talvaar ki kaaT teri yaadon mein bhi ab zahr milaa ho goyaa pichhle mausam mein sabhi girya-kunaan the magar ab chashm-e-khun-rang mein sailaab rukaa ho goyaa chaand niklaa to miri zaat ko andaaza huaa us ne chupke se miraa naam liyaa ho goyaa chun liyaa main ne to phir apni mohabbat kaa khudaa us ko ab bhi hai gumaan meraa khudaa ho goyaa ek muddat se khalaaon mein thiin aankhein raushan ab ye 'aalam hai ki aankhon mein khalaa ho goyaa phuul khilne ko to naqqaash khile khvaab magar mere zakhmon ke chaTakhne ki sadaa ho goyaa"

"lamha lamha biit chukaa hai ab jo tum pachhtaao to kyaa bhuli-bisri yaadein sab ke aage bhi doharaao to kyaa kaun paraayaa dard sameTe kaun kisi kaa yaar bane apnaa zakhm hai apnaa pyaare logon ko dikhlaao to kyaa pahle to tum aag lagaa kar sab kuchh jaltaa chhoD gae divaarein taarik hui hain ab is ghar mein aao to kyaa us kaa chehra us ki aankhein us ke lab vo baat kahaan rang-birangi akhbaaron ki tasvirein dikhlaao to kyaa main ik aisaa peD huun jis par baiTh ke sab uD jaate hain tum bhi meri shaakh pe aa kar baiTho aur uD jaao to kyaa soch ki dhuup to kyaa kam hogi soch ki kirnein aam huiin raat ke saae mere sar ke suraj par phailaao to kyaa toD ke pairon ki zanjirein maidaanon kaa azm karo apne garebaanon ke parcham kamron mein lahraao to kyaa apne badan ko surat aisi nazr-e-salib-e-zulm karo sone ki maasum salibein sinon par laTkaao to kyaa kyaa kyaa sher kiye hain tum ne naqsh ghazal ki surat mein ham tum ko 'naqqaash' kaheinge tum shaair kahlaao to kyaa"

"zakhm apnaa saa kaam kar na jaae phir dard ki lai bikhar na jaae jab us ki nigaah us taraf hai kyuun meri nazar udhar na jaae hai fasl-e-junun ki aamad aamad peDon kaa libaas utar na jaae ab mujh se na mil ki zahr meraa nas nas mein tire utar na jaae muddat se milaa nahin huun us se vo mere baghair mar na jaae aisaa to nahin ki lauT jaaun ab aage jo ham-safar na jaae"

"dil ye kahtaa hai ki royaa jaae aankh ke pyaalon ko dhoyaa jaae le uDaa khvaab tu aankhon se koi ab na aaraam se soyaa jaae haar jab TuuT ke bikhre har-su aansuon ko hi piroyaa jaae dhyaan kaa shahr to khone kaa nahin aao is shahr mein khoyaa jaae raat hansti hai to shabnam ban kar daaman-e-dil ko bhigoyaa jaae hai ye 'naqqaash' numaaish kaisi dil to har-gaam pe khoyaa jaae"

"TuuTaa hai aaj abr jo is aan-baan se barsegaa kal lahu bhi tire aasmaan se ye kis ke dil ki aag se jalte hain baam-o-dar sho'le se uTh rahe hain badan ke makaan se suraj ki tez dhuup se shaayad amaan mile rukti hai gham ki dhuup kahin saaebaan se chehron pe gard aankhon mein nindein fazaa khamosh sustaa rahe hain log safar ki takaan se hai apni apni taaqat-e-parvaaz kaa kamaal matlab kisi ko kyaa tiri unchi uDaan se aakhir chaTakh chaTakh ke bikharne lagaa huun main Takraa gayaa thaa raat khud apni chaTaan se phirte hain shahr-e-dard mein jo be-dili ke saath 'naqqaash'-kaazmi hain vahi naujavaan se"

"sukut-e-shab mein andheron ko muskuraane de bujhe charaagh to phir jism-o-jaan jalaane de dukhon ke khvaab-numaa nim-vaa darichon mein vafur-e-karb se taaron ko jhilmilaane de jalaanaa chaahe agar chaahaton kaa suraj bhi badan ke shahr ko is dhuup mein jalaane de tu apne sang-numaa ruuh ke safine ko gham-e-vafaa ke samundar mein Duub jaane de mire vajud mein kaanTon kaa ek jangal hai vo apni zaat ke phulon mein kyuun samaane de kise khabar hai ki ham donon apne qaatil hain jo be-khabar hain unhein chikh kar bataane de huun muntazir ki koi aaj aane vaalaa hai ba-qadr-e-zauq dar-o-baam ko sajaane de guzarte lamhon ke hamraah TuTtaa hai badan visaal-e-yaar ki lazzat kaa baar uThaane de main pattharon ki tarah chup nahin ai tesha-ba-dast vo aur hogaa tujhe zarb jo lagaane de jab apne paanv mein zanjir paD gai hai to phir chalaa to jaataa nahin gard hi uDaane de bhaTak rahaa huun bagulon ke rang mein 'naqqaash' badan to khaak huaa ruuh bhi jalaane de"

"phailaa ke sar pe dard ki chaadar chalaa gayaa ik shakhs meri ruuh pe nashtar chalaa gayaa mujh se khataa hui thi ki aisi miraa khudaa naaraaz ho ke shahr se baahar chalaa gayaa shishe lahuluhaan paDe hain jo farsh par khiDki pe koi maar ke patthar chalaa gayaa baahar kaa shor itnaa garaan thaa ki bahr-e-amn har shakhs apni zaat ke andar chalaa gayaa Thahraa thaa aa ke ek musaafir kabhi yahaan phir shahr-e-tan ko aag lagaa kar chalaa gayaa kaabuk ko khaali dekh ke kuDhtaa hai dil miraa jaane kahaan safed kabutar chalaa gayaa suraj bhi thak ke Duub gayaa shaam ho gai din-bhar jo mere saath thaa vo ghar chalaa gayaa aakhir saron pe dhuup ki divaar gir paDi achchhaa huaa main saae se uTh kar chalaa gayaa 'naqqaash' dil mein pyaas ki kilein gaDi rahin qadmon mein aa ke ek samundar chalaa gayaa"