pahle hi kyaa kam tamaashe the yahaan — Aashufta Changezi

kis ki talaash hai hamein kis ke asar mein hain
jab se chale hain ghar se musalsal safar mein hain

hamein bhi aaj hi karnaa thaa intizaar us kaa
use bhi aaj hi sab vaade bhuul jaane the

teri khabar mil jaati thi
shahr mein jab akhbaar na the

tujh ko bhi kyuun yaad rakhaa
soch ke ab pachhtaate hain

khvaab jitne dekhne hain aaj saare dekh lein
kyaa bharosa kal kahaan paagal havaa le jaaegi

savaal karti kai aankhein muntazir hain yahaan
javaab aaj bhi ham soch kar nahin aae

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

pyaaso raho na dasht mein baarish ke muntazir
maaro zamin pe paanv ki paani nikal paDe