karte hain arbaab-e-dil andaaza-e-josh-e-bahaar — Abbas Ali Khan Bekhud

hamaari naa-umidi kaa to hai ilzaam qismat par
tumhaaraa muddaaa hotaa to manzur-e-khudaa hotaa hotaa

haalat ke taghayyur par ho maatam-e-maazi kyuun
ik vo bhi zamaana thaa ik ye bhi zamaanaa hai

tavajjoh chaara-gar ki baais-e-taklif hai 'bekhud'
izaafa hai musibat mein davaaon kaa asar karnaa

in buton ne mujh ko be-khud kis qadar dhoke diye
sidhaa-saada jaan kar mard-e-musalmaan dekh kar

azal se sokhta-saamaan huun fikr-e-aashiyaan kyaa ho
na girti barq to ye soz-e-dil se jal gayaa hotaa

kisi se ishq karnaa aur is ko baa-khabar karnaa
hai apne matlab-e-dushvaar ko dushvaar-tar karnaa

main baDaa ho gayaa huun magar bachpanaa
mere dil se kabhi bhi gayaa hi nahin

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

main badalte hue haalaat mein Dhal jaataa huun
dekhne vaale adaakaar samajhte hain mujhe

dil-e-haris hi apnaa na ho sakaa qaane
vagarna tere karam mein to kuchh kami na rahi

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh