kabhi na khaali milaa bu-e-ham-nafas se dimaagh — Abul Hasanat Haqqi

apne manzar se alag hotaa nahin hai koi rang
apni aankhon ke sivaa baad-e-bahaari aur kyaa

badan khud apni hi tajsim kar nahin paate
qarib aayaa to aankhon ko khvaab main ne diyaa

main apne zahr se vaaqif huun vo samajhtaa nahin
hai mere kisa-e-sad-kaam mein sharaafat bhi

vo mehrbaan nahin hai to phir khafaa hogaa
koi to raabta us ko bahaal rakhnaa hai

ye sach hai us se bichhaD kar mujhe zamaana huaa
magar vo lauTnaa chaahe to phir zamaana bhi kyaa

duur rahtaa hai magar jumbish-e-lab bos-o-kanaar
Dubtaa rahtaa hai dariyaa mein kinaaraa kyaa kyaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

maarka garm to ho lene do khun-rezi kaa
pahle shamshir ke niche hamin jaa baiTheinge