khvaab taabir kar ke dekh sakein — Adeel Zaidi

de hausle ki daad ki ham tere gham mein aaj
baiThe hain mahfilon ko sajaae tire baghair

kahaan ke maahir-o-kaamil ho tum hunar mein 'adil'
tumhaare kaam to parvardigaar kartaa hai

miraa dil TuuT jaane par miyaan hairat bhalaa kaisi
agar rasta badal jaae sitaare TuuT jaate hain

tu mujh se duur chali jaae ain mumkin hai
magar vo aks jo meri nazar mein rahtaa hai

judaa jo ho gae tasbih-e-roz-o-shab se 'adil'
main zindagi mein vo daane piro nahin saktaa

aazaadiyon ke shauq o havas ne hamein 'adil'
ik ajnabi zamin kaa qaidi banaa diyaa

mere khvaabon ke jharokon ko sajaate rahiye
na sahi vasl magar yaad to aate rahiye

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

tiri shokh aankhon mein baarhaa kai khvaab dekhe hain pyaar ke
tiraa pyaar meraa nasib hai kisi aur ko ye vafaa na de

khvaabon ki kirchiyaan miri muTThi mein bhar na jaae
aainda lamha ab ke bhi yunhi guzar na jaae

raat aangan mein chaand utraa thaa
tum mile the ki khvaab dekhaa thaa

khvaabon ke ufuq par tiraa chehra ho hamesha
aur main usi chehre se nae khvaab sajaaun