ab yahaan kaun nikaalegaa bhalaa duudh ki nahr — Ahmad Ata

naa-rasaai ne ajab taur sikhaae hain 'ataa'
yaani bhule bhi nahin tum ko pukaaraa bhi nahin

saDak pe baiTh gae dekhte hue duniyaa
aur aise tark hui ek khud-kushi ham se

vaisaa hi kharaab shakhs huun main
jaisaa koi chhoD kar gayaa thaa

main teri ruuh mein utraa huaa milungaa tujhe
aur is tarah ki tujhe kuchh khabar nahin honi

hanste hanste ho gayaa barbaad main
khush-dili aisi bhi hoti hai bhalaa

aaj dekhaa hai use aisi mohabbat se 'ataa'
vo yahi bhuul gayaa us ko kahin jaanaa thaa

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

makin-e-dil ko khaanumaa-kharaabiyon se ishq thaa
qayaam DhunDhtaa rahaa tumhaari chhat ke baa'd bhi

tamaam farq mohabbat mein ek baat ke hain
vo apni zaat kaa naiin hai ham us ki zaat ke hain

ye risaala ishq kaa hai adaq tire ghaur karne kaa hai sabaq
kabhi dekh is ko varaq varaq miraa siina gham ki kitaab hai