jaise pau phaT rahi ho jangal mein — Ahmad Mushtaq

khoyaa hai kuchh zarur jo us ki talaash mein
har chiiz ko idhar se udhar kar rahe hain ham

dukh ke safar pe dil ko ravaana to kar diyaa
ab saari umr haath hilaate raheinge ham

koi tasvir mukammal nahin hone paati
dhuup dete hain to saayaa nahin rahne dete

mohabbat mar gai 'mushtaaq' lekin tum na maanoge
main ye afvaah bhi tum ko sunaa kar dekh letaa huun

tire aane kaa din hai tere raste mein bichhaane ko
chamakti dhuup mein saae ikaTThe kar rahaa huun main

paani mein aks aur kisi aasmaan kaa hai
ye naav kaun si hai ye dariyaa kahaan kaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

kahaan milegi misaal meri sitamgari ki
ki main gulaabon ke zakhm kaanTon se si rahaa huun

badle hain zamaane ne khad-o-khaal tire bhi
ab tujh ko koi dekh ke paagal nahin hotaa

maanaa ki is zamin ko na gulzaar kar sake
kuchh khaar kam to kar gae guzre jidhar se ham

jismon se nikal rahe hain saae
aur raushni ko nigal rahe hain