mujh saa dariyaa simaT gayaa jin mein — Ali Haidar Alvi

ye vo nidaa hai jo sab tak khudaa se aati hai
ki naa't fan se nahin iltijaa se aati hai

shaa'iri karbalaa hai jis par se
har payambar guzar ke aataa hai

koi saahil-mizaaj hai jis ne
mujh samundar kaa e'tibaar kiyaa

vo paanv rakhne lagi hai nadi ke paani mein
hujum gaanv kaa mashkize le ke baiThaa hai

is tajassus mein hi saahil pe khaDaa rahtaa huun
ye samundar bhi kisi aankh kaa paani to nahin

tire badan ki tanaabein to main ne khinchi thiin
magar ye khema kisi aur ko nasib huaa

chaand bhi hairaan dariyaa bhi pareshaani mein hai
aks kis kaa hai ki itni raushni paani mein hai

chaand hai paani mein yaa bhule hue chehre kaa aks
saahil-e-dariyaa pe dekho main bhi hairaani mein huun

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

miri is chashm-e-tar se abr-e-baaraan ko hai kyaa nisbat
ki vo dariyaa kaa paani aur ye khun-e-dil hai barsaati

sab ummidein mire aashob-e-tamannaa tak thiin
bastiyaan ho gaiin gharqaab to dariyaa utraa

kaun hain vo jinhein aafaaq ki vusat kam hai
ye samundar na ye dariyaa na ye sahraa meraa