main ne dafnaae vaaldain apne — Amaan Ali Khan

khush-nasibi hai tumhaari sar pe hai jo maan kaa haath
ham yatimon ko pata hai ye du'aa kyaa chiiz hai

shab-e-gham ki yuun bhi main kartaa huun 'izzat
ye shab 'umr mein mujh se kaafi baDi hai

kuchh der to Dare tiri jaadugari se ham
phir dekhne lage tujhe sanjidgi se ham

us ne rakkhaa thaa haath saahil par
tab se dariyaa mein bhi sharaare hain

saath jab chhoD gae meraa tum ai kuza-gar
khud ko majburi mein phir khud hi taraashaa main ne

dhuein ne bhinch di chikhein tabhi pata ye chalaa
ki ghar mein ek daricha bahut zaruri hai

zindagi ko hausla dene ke khaatir
khvaahishon ko reza reza chun rahaa huun

har ek baat ko chup-chaap kyuun sunaa jaae
kabhi to hausla kar ke nahin kahaa jaae

zindagi phaili hui thi shaam-e-hijraan ki tarah
kis ko itnaa hausla thaa kaun ji kar dekhtaa

khudaa kare ki vahi baat us ke dil mein ho
jo baat kahne ki himmat juTaa rahaa huun main

aziiz gar thaa ta'alluq to kis liye toDaa
jab ikhtilaaf kiyaa to mufaahamat kaisi

main aandhiyon ke paas talaash-e-sabaa mein huun
tum mujh se puchhte ho miraa hausla hai kyaa