fitrat kaa ye sitam bhi hai 'daanish' ajiib chiiz — Aqeel Danish

main bhi sach kahtaa huun is jurm mein duniyaa vaalo
mere haathon mein bhi ik zahr kaa piyaala de do

ab bhi kuchh log mohabbat pe yaqin rakhte hain
ho jo mumkin to unhein des nikaalaa de do

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

jinhein ye fikr nahin sar rahe rahe na rahe
vo sach hi kahte hain jab bolne pe aate hain

maango samundaron se na saahil ki bhiik tum
haan fikr o fan ke vaaste gahraai maang lo

qulzum-e-fikr mein hai kashti-e-imaan saalim
naa-khudaa husn hai aur ishq hai langar apnaa

jab bhi ye sochne lagtaa huun ki kaun apnaa hai
zehn mein aa ke kai naam nikal jaate hain

har subh nikalte hain yahi soch ke ghar se
bikhri hui duniyaa ko sameTeinge kisi din