thaa e'timaad-e-husn se tu is qadar tahi — Arif Abdul Mateen

kabhi khayaal ke rishton ko bhi TaTol ke dekh
main tujh se duur sahi tujh se kuchh judaa bhi nahin

vafaa nigaah ki taalib hai imtihaan ki nahin
vo meri ruuh mein jhaanke na aazmaae mujhe

hamin ne raaston ki khaak chhaani
hamin aae hain tere paas chal ke

zaat kaa aaina jab dekhaa to hairaani hui
main na thaa goyaa koi mujh saa thaa mere ru-ba-ru

titliyaan rangon kaa mahshar hain kabhi sochaa na thaa
un ko chhune par khulaa vo raaz jo khultaa na thaa!

tira-o-taar khalaaon mein bhaTaktaa rahaa zehan
raat sahraa-e-anaa se main hiraasaan guzraa

har ek baat ko chup-chaap kyuun sunaa jaae
kabhi to hausla kar ke nahin kahaa jaae

zindagi phaili hui thi shaam-e-hijraan ki tarah
kis ko itnaa hausla thaa kaun ji kar dekhtaa

khudaa kare ki vahi baat us ke dil mein ho
jo baat kahne ki himmat juTaa rahaa huun main

aziiz gar thaa ta'alluq to kis liye toDaa
jab ikhtilaaf kiyaa to mufaahamat kaisi

har taraf hain khaana-barbaadi ke manzar be-shumaar
kuchh Thikaana hai bhalaa is jazba-e-taamir kaa

saaqi mujhe sharaab ki tohmat nahin pasand
mujh ko tiri nigaah kaa ilzaam chaahiye