ik teri be-rukhi se zamaana khafaa huaa — Arsh Siddiqui

vo ayaadat ko to aayaa thaa magar jaate hue
apni tasvirein bhi kamre se uThaa kar le gayaa

zamaane bhar ne kahaa 'arsh' jo, khushi se sahaa
par ek lafz jo us ne kahaa sahaa na gayaa

ek lamhe ko tum mile the magar
umr bhar dil ko ham masalte rahe

haan samundar mein utar lekin ubharne ki bhi soch
Dubne se pahle gahraai kaa andaaza lagaa

ham ki maayus nahin hain unhein paa hi leinge
log kahte hain ki DhunDe se khudaa miltaa hai

bas yunhi tanhaa rahungaa is safar mein umr bhar
jis taraf koi nahin jaataa udhar jaataa huun main

main baDaa ho gayaa huun magar bachpanaa
mere dil se kabhi bhi gayaa hi nahin

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

chaand ne taan li hai chaadar-e-abr
ab vo kapDe badal rahi hogi

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

dil-e-haris hi apnaa na ho sakaa qaane
vagarna tere karam mein to kuchh kami na rahi