bilaa-sabab to koi barg bhi nahin hiltaa — Arshad Kamal

vo aae to lagaa gham kaa mudaavaa ho gayaa hai
magar ye kyaa ki gham kuchh aur gahraa ho gayaa hai

vo zamaane kaa taghayyur ho ki mausam kaa mizaaj
be-zarar donon hain nairangi-e-aadaam ke sivaa

mujh ko talaash karte ho auron ke darmiyaan
hairaan ho rahaa huun tumhaare gumaan par

kabhi un kaa nahin aanaa khabar ke zail mein thaa
magar ab un kaa aanaa hi tamaashaa ho gayaa hai

ye maanaa sail-e-ashk-e-gham nahin kuchh kam magar 'arshad'
zaraa utraa nahin dariyaa ki banjar jaag uThtaa hai

khaak-e-sahraa to bahut duur hai ai vahshat-e-dil
kyuun na zehnon pe jami gard uDaa di jaae

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

shor din ko nahin sone detaa
shab ko sannaaTaa jagaa detaa hai

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

vasl ki shab thi aur ujaale kar rakkhe the
jism o jaan sab us ke havaale kar rakkhe the

aur bhi kitne tariqe hain bayaan-e-gham ke
muskuraati hui aankhon ko to pur-nam na karo

phir is ke baad miri raat be-misaal hui
udhar vo shola-badan thaa idhar main paani thaa