letaa nahin kisi kaa pas-e-marg koi naam — Asad Badayuni

bichhaD ke tujh se kisi dusre pe marnaa hai
ye tajraba bhi isi zindagi mein karnaa hai

aate hain barg-o-baar darakhton ke jism par
tum bhi uThaao haath ki mausam duaa kaa hai

jise na meri udaasi kaa kuchh khayaal aayaa
main us ke husn pe ik roz khaak Daal aayaa

chaman vahi ki jahaan par labon ke phuul khilein
badan vahi ki jahaan raat ho gavaaraa bhi

mohabbatein bhi usi aadmi kaa hissa thiin
magar ye baat puraane zamaane vaali hai

meri rusvaai ke asbaab hain mere andar
aadmi huun so bahut khvaab hain mere andar

bichhaDnaa bhi tumhaaraa jite-ji ki maut hai goyaa
use kyaa khaak lutf-e-zindagi jis se judaa tum ho

marte hain aarzu mein marne ki
maut aati hai par nahin aati

karo kaj jabin pe sar-e-kafan mire qaatilon ko gumaan na ho
ki ghurur-e-ishq kaa baankpan pas-e-marg ham ne bhulaa diyaa

hove na azaab us pe kabhi jis ke pas-e-marg
chhaati pe ho taaviz tire naqsh-e-qadam kaa

manzil-e-marg ke aa pahunche hain nazdik ab to
kar madad ai nafas-e-baaz-pasin thoDi si

maut ne kar diyaa laachaar vagarna insaan
hai vo khud-bin ki khudaa kaa bhi na qaail hotaa