dard-e-mahrumi-e-jaaved bhi ik daulat hai — Azeem Murtaza

ab imtiyaaz-e-zaahir-o-baatin bhi miT gayaa
dil chaak ho rahaa hai garebaan ke saath saath

kyaa kyaa faraaghatein thiin mayassar hayaat ko
vo din bhi the ki tere sivaa koi gham na thaa

khulus-e-niyat-e-rahbar pe munhasir hai 'azim'
maqaam-e-ishq bahut duur bhi hai paas bhi hai

aaj tak yaad hai vo shaam-e-judaai kaa samaan
teri aavaaz ki larzish tire lahje ki thakan

kuchh naqsh tiri yaad ke baaqi hain abhi tak
dil be-sar-o-saamaan sahi viraan to nahin hai

ek dard-e-hasti ne umr bhar rifaaqat ki
varna saath detaa hai kaun aakhiri dam tak

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

mire aibon ko ginvaayaa to sab ne
kisi ne meri gham-khvaari nahin ki

hamaare she'r naghme aur sajde
adaa jo ho na paae kyaa hue vo

us but ke nahaane se huaa saaf ye paani
moti bhi sadaf mein tah-e-dariyaa nazar aayaa