eDiyaan maar ke zakhmi bhi hue log magar — Azlan Shah

mujh ko pahchaan tu ai vaqt main vo huun jo faqat
ek ghalati ke liye arsh-e-barin se niklaa

tum mohabbat kaa use naam bhi de lo lekin
ye to qissa kisi haari hui taqdir kaa hai

chupke se guzarte hain khabar bhi nahin hoti
din raat bhi kam-bakht javaani ki tarah hain

kisi ke naam pe nanhe diye jalaate hue
khudaa ko bhuul gae nekiyaan kamaate hue

chand qadmon se ziyaada nahin chalne paate
jis ko dekho vahi qaidi kisi zanjir kaa hai

haar ko jiit ke imkaan se baandhe hue rakh
apni mushkil kisi aasaan se baandhe hue rakh

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa