khaamoshi mein chaahe jitnaa begaana-pan ho — Bharat Bhushan Pant

sabab khaamoshiyon kaa main nahin thaa
mire ghar mein sabhi kam bolte the

ham saraabon mein hue daakhil to ye ham par khulaa
tishnagi sab mein thi lekin tishnagi mein kaun thaa

hamaari baat kisi ki samajh mein kyuun aati
khud apni baat ko kitnaa samajh rahe hain ham

main thoDi der bhi aankhon ko apni band kar luun to
andheron mein mujhe ik raushni mahsus hoti hai

hamaare haal pe ab chhoD de hamein duniyaa
ye baar baar hamein kyuun bataanaa paDtaa hai

ghar se nikal kar jaataa huun main roz kahaan
ik din apnaa pichhaa kar ke dekhaa jaae

main baDaa ho gayaa huun magar bachpanaa
mere dil se kabhi bhi gayaa hi nahin

dafnaa diyaa thaa jin ko gunje hain har taraf ab
meri khamoshiyon ko aavaaz mil gai hai

tum hanso to din nikle chup raho to raatein hain
kis kaa gham kahaan kaa gham sab fuzul baatein hain

dilon ke mel se aage labon ke silsile saare
jo lab khaamosh hote hain to aankhein baat karti hain

andar aisaa habs thaa main ne khol diyaa darvaaza
jis ne dil se jaanaa hai vo khaamoshi se jaae

izhaar-e-muddaaa kaa iraada thaa aaj kuchh
tevar tumhaare dekh ke khaamosh ho gayaa