uTh kar chale gae to kabhi phir na aaeinge — Bilqis Zafirul Hasan

teri to 'bilqis' niraali hi baatein hain
is duniyaa mein kaise tiraa guzaaraa hogaa

apni to koi baat banaae nahin bani
kuchh ham na kah sake to kuchh us ne nahin suni

hai yuun ki kuchh to baghaavat-sirisht ham bhi hain
sitam bhi us ne zarurat se kuchh ziyaada kiyaa

dahshat-zada zamin par vahshat bhare makaan ye
is shahr-e-be-amaan kaa aakhir koi khudaa hai

bas ek jaan bachi thi chhiDak di raahon par
dil-e-gharib ne ik ehtimaam saada kiyaa

dar badar ki khaak thi taqdir mein
ham liye kaandhon pe ghar chalte rahe

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

yaad ki khushbu dil ke nagar mein phailegi
gham ke saae lagte hain ab shital se

hamein baada-kash-e-dard-e-tamannaa
hamin par band hai mai-khaana dil kaa

hujum-e-subh ki tanhaaiyon mein Duub gae
vo qaafile jo andheron ki anjuman se chale