ek be-chehra musaafir rang oDhe — Daniyal Tareer

khvaab jazira ban sakte the nahin bane
ham bhi qissa ban sakte the nahin bane

khvaab kaa kyaa hai raat ke naqsh-o-nigaar banaao
raat ke naqsh-o-nigaar banaao khvaab kaa kyaa hai

shelf pe ulTaa kar ke rakh do aur bisraa do
gul-daanon mein phuul sajaao khvaab kaa kyaa hai

darinde saath rahnaa chaahte hain aadmi ke
ghanaa jangal makaanon tak pahunchnaa chaahtaa hai

dekhnaa ye hai ki jangal ko chalaane ke liye
mashvara richh se aur chiil se hogaa ki nahin

aakhir jism bhi divaaron ko saunp gae
darvaazon mein aankhein dharne vaale log

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

barsaat kaa baadal to divaana hai kyaa jaane
kis raah se bachnaa hai kis chhat ko bhigonaa hai

yuun to maujud apne ghar mein hai
aadmi mustaqil safar mein hai

safar mein aise kai marhale bhi aate hain
har ek moD pe kuchh log chhuT jaate hain

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar