shelf pe ulTaa kar ke rakh do aur bisraa do — Daniyal Tareer

khvaab jazira ban sakte the nahin bane
ham bhi qissa ban sakte the nahin bane

khvaab kaa kyaa hai raat ke naqsh-o-nigaar banaao
raat ke naqsh-o-nigaar banaao khvaab kaa kyaa hai

darinde saath rahnaa chaahte hain aadmi ke
ghanaa jangal makaanon tak pahunchnaa chaahtaa hai

ek be-chehra musaafir rang oDhe
dhund mein chalte hue dekhaa gayaa hai

dekhnaa ye hai ki jangal ko chalaane ke liye
mashvara richh se aur chiil se hogaa ki nahin

aakhir jism bhi divaaron ko saunp gae
darvaazon mein aankhein dharne vaale log

mere khvaabon ke jharokon ko sajaate rahiye
na sahi vasl magar yaad to aate rahiye

hamaaraa ishq ravaan hai rukaavaTon mein 'zafar'
ye khvaab hai kisi divaar se nahin ruktaa

andheri shab kaa ye khvaab-manzar mujhe ujaalon se bhar rahaa hai
to raat itni tavil kar de ki taa-qayaamat sahar na aae

khvaab Thahre the to aankhein bhigne se bach gaiin
varna chehre par to gham ki baarishon kaa aks hai

ik yaqin-parvar gumaan aur ik hayaat-aamez khvaab
jaise koi aaegaa aur uljhanein le jaaegaa

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne