be-badan ruuh bane phirte rahoge kab tak — Farhat Ehsas

vo chaand kah ke gayaa thaa ki aaj niklegaa
to intizaar mein baiThaa huaa huun shaam se main

ek bose ke bhi nasib na hon
honTh itne bhi ab gharib na hon

phir soch ke ye sabr kiyaa ahl-e-havas ne
bas ek mahina hi to ramzaan rahegaa

mire ashaar hain vo aasmaani khvaab jin ko
miri miTTi ke honThon par utaaraa jaa rahaa hai

ik aayat-e-vajud huun miTTi ke Dher mein
mere nuzul ki to koi shaan hi nahin

mohabbat phuul banne par lagi thi
palaT kar phir kali kar li hai main ne

main baDaa ho gayaa huun magar bachpanaa
mere dil se kabhi bhi gayaa hi nahin

milte ho to ab tum bhi bahut rahte ho khaamosh
kyaa tum ko bhi ab meri khabar hone lagi hai

chup chup makaan raaste gum-sum niDhaal vaqt
is shahr ke liye koi divaanaa chaahiye

khaamoshi mein rahne vaale logon ko
sannaaTe ki guunj sunaai deti hai

khamoshi se adaa ho rasm-e-duri
koi hangaama barpaa kyuun karein ham

ik hamaari sadaa thi is ban mein
lo ji khaamosh ho gae ham bhi