har ek lafz mein poshida ik alaao na rakh — Farooq Shamim

jhuuT sach mein koi pahchaan kare bhi kaise
jo haqiqat kaa hi meyaar fasaana Thahraa

apne hi fan ki aag mein jalte rahe 'shamim'
honTon pe sab ke hausla-afzaai rah gai

dhuup chhuti hai badan ko jab 'shamim'
barf ke suraj pighal jaate hain kyuun

hisaar-e-zaat se kaT kar to ji nahin sakte
bhanvar ki zad se yuun mahfuz apni naav na rakh

vaqt ik mauj hai aataa hai guzar jaataa hai
Duub jaate hain jo lamhaat ubharte kab hain

hain raakh raakh magar aaj tak nahin bikhre
kaho havaa se hamaari misaal le aae

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe

barseingi aaj rahmatein aamad hai yaar ki
naayaab hain ye ghaDiyaan tire intizaar ki

jab ki pahlu se yaar uThtaa hai
dard be-ikhtiyaar uThtaa hai

lamhaat-e-vasl yaad jo aae shab-e-firaaq
yak-lakht surkh ho gae aariz be-ikhtiyaar

kyaa jaaniye ki vasl tiraa kis ko ho nasib
ham to tire firaaq mein ai yaar mar gae

na kaho ye ki yaar jaataa hai
meraa sabr-o-qaraar jaataa hai