jiyaa huun umr bhar main bhi akelaa — Navneet Sharma

kis ne sochaa thaa ki khud se mil kar
apni aavaaz se Dar jaanaa hai

choT khaae hue lamhon kaa sitam hai ki use
ruuh ke chehre pe dikhte hain muhaanse kitne

mire qarib koi khvaab kaise aa paataa
ki mujh mein rahte hain barson se ratjage raushan

phone par baat hui us se to andaaza huaa
apni aavaaz mein bas aaj hi shaamil huaa main

mire andar miraa kuchh bhi nahin bas tu hai baaqi
tire andar bataa pyaare main ab kitnaa bachaa huun

ek tasvir ko haTaayaa bas
dil ki divaar khaali khaali hai

kam-umri mein sunet hain
mar jaate hain achchhe log

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

jin ke baghair lagti thi be-kaar zindagi
un se hi baat karne ki hasrat nahin rahi

nikle kabhi na ghar se magar is ke baavajud
apni tamaam umr safar mein guzar gai

dimaagh ko kar rahaa huun raushan main daagh-e-dil ke jalaa rahaa huun
ab apni taarik zindagi kaa nayaa saraapaa banaa rahaa huun