maidaan mein akelaa nihatthaa khaDaa thaa main — Deepak Agrawal

mire saath koi to ho jise main ye kah sakun
main kise kahun mujhe chhoD de mire haal par

yahaan darvaaze dastak de rahe hain
havaa ne khel ulTaa kar diyaa hai

yuun kinaare se mohabbat na kiyaa kar ham se
is se behtar hai mohabbat se kinaaraa kar le

rang bharte hain saadgi mein sab
main ne rangon ko saadgi di hai

dekh le mujh ko andhere mein nazar aataa huun main
chikhne vaale tire andar kaa sannaaTaa huun main

is tarah hasrat-e-didaar nikal kar aai
ek aahaT pe vo sau baar nikal kar aai

khalq be-parvaa khudaa bandon se tang aayaa huaa
main akelaa phir rahaa huun hashr ke maidaan mein

main akelaa huun tu bhi tanhaa hai
ham bhi kitne hain be-sahaare dekh

dasht ki naa-tamaam raahon par
koi saathi hai to shajar tanhaa

tum se mile to khud se ziyaada
tum ko akelaa paayaa ham ne

go mujhe ehsaas-e-tanhaai rahaa shiddat ke saath
kaaT di aadhi sadi ek ajnabi aurat ke saath

main 'shaad' tanhaa ik taraf duniyaa ki duniyaa ik taraf
saaraa samundar ik taraf aansu kaa qatra ik taraf