raae us par mat karo qaaem koi — Iftikhar Raghib

ik baDi jang laD rahaa huun main
hans ke tujh se bichhaD rahaa huun main

dil mein kuchh bhi to na rah jaaegaa
jab tiri chaah nikal jaaegi

chand yaadein hain chand sapne hain
apne hisse mein aur kyaa hai ji

ye vasl ki rut hai ki judaai kaa hai mausam
ye gulshan-e-dil hai ki bayaabaan kahin kaa

tum ne rasman mujhe salaam kiyaa
log kyaa kyaa gumaan kar baiThe

be-sabab 'raaghib' taDap uThtaa hai dil
dil ko samjhaanaa paDegaa Thiik se

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kyon tasavvur mein ji rahaa huun main
jab haqiqat mein mar hi jaanaa hai

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

tilaai rang jaanaan kaa agar mazmun likhun khat mein
to haala gird harfon ke bane sone ke paani kaa

aag to chaaron hi jaanib thi par achchhaa ye hai
hosh-mandi se kisi chiiz ko jalne na diyaa