shaam hui jale charaagh uTh gae raah se faqir — Ijtiba Rizvi

is hirs-o-havas ke mele mein ham jins-e-mohabbat laae hain
sab saste maal ke gaahak hain ye mahngaa saudaa kaun kare

sajda vo hai ba-rabb-e-kaaba
jis ko qaid-e-haram nahin hai

khuub tamaashaa ham ko banaayaa aap tamaashaa aap hue
ham ko rusvaa karne nikle kaise rusvaa aap hue

ye hamaari aap ki duriyaan ye kabhi kabhi ki huzuriyaan
hain ajab tarah ki lagaavTein rah-o-rasm-e-dur-o-daraaz mein

ek din rindon ne masjid mein namaaz aa ke paDhi
dusre din use mai-khaana banaa kar chhoDaa

khirad ko khaana-e-dil kaa nigah-baan kar diyaa ham ne
ye ghar aabaad hotaa is ko viraan kar diyaa ham ne

kisi darvesh ke hujre se abhi aayaa huun
so tire hukm ki taamil nahin karni mujhe

ham faqiron mein raaja ki chauki chaDhe kaahinon mein payambar pukaare gae
din nikalne kaa bhi vaaqia hai koi yaa abhi tak dhari ki dhari raat hai

sunte hain ishq naam ke guzre hain ik buzurg
ham log bhi faqir usi silsile ke hain

us ke dar par main gayaa saang banaae to kahaa
chal be chal duur ho kyaa le ke faqiri aayaa

faqir log rahe apne apne haal mein mast
nahin to shahr kaa naqsha badal chukaa hotaa

dil de na de magar ye tiraa husn-e-be-misaal
vaapas na kar faqir ko aakhir badan to hai