tum ne bahtaa dariyaa dekhaa aur main ne — Iqbal Khawar

aaine par koi tohmat na dharo
khaal-o-khad apne sanvaaro saahab

bahut hairat-zada hai aaina bhi
ki chehre par koi chehra nahin hai

niind mat DhunD meri aankhon mein
silvaTein dekh mere bistar par

us ko matlab kaa jab milaa mausam
rang us ke the dekhne vaale

tu bhi dekhegaa zaraa rang utar lein tere
ham hi rakhte hain tujhe yaad ki sab rakhte hain

izhaar ki ye bhi surat thi
khaamoshi ko fariyaad kiyaa

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

jin safinon ne kabhi toDaa thaa maujon kaa ghurur
us jagah Duube jahaan dariyaa mein tughyaani na thi

agarche kahne ko kal kaaenaat apni thi
haqiqatan kahaan apni bhi zaat apni thi

ik nadi mein saikDon dariyaa ki tughyaani mili
Dubne vaale ko mar jaane ki aasaani mili

raabta kyuun rakhun main dariyaa se
pyaas bujhti hai meri sahraa se

pahaaD jaisi azmaton kaa daakhila thaa shahr mein
ki log aagahi kaa ishtihaar le ke chal diye