agarche kahne ko kal kaaenaat apni thi — Masooda Hayat

khushbu si koi aae to lagtaa hai ki tum ho
shisha kahin Takraae to lagtaa hai ki tum ho

kyaa gharaz ham ko vahaan ab koi bhi aabaad ho
ham to us basti se ghar apnaa uThaa kar le gae

ghar se jo shakhs bhi nikle vo sambhal kar nikle
jaane kis moD pe kis haath mein khanjar nikle

kis se shikva karein viraani-e-hasti kaa 'hayaat'
ham ne khud apni tamannaaon ko jiine na diyaa

hazaar shauq numaayaan the jis nazar se kabhi
vahi nigaah baDi ajnabi si lagti hai

hazaar dard sameTe hue huun ik dil mein
bikhar gai jo miri daastaan to kyaa hogaa

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

farz hai dariyaa-dilon par khaaksaaron ki madad
farsh sahraa ke liye laazim huaa sailaab kaa

ratb-o-yaabis mein hai tasarruf-e-ishq
aankh dariyaa hai dil jazira hai

but nazar aaeinge maashuqon ki kasrat hogi
aaj but-khaana mein allaah ki qudrat hogi

shikva koi dariyaa ki ravaani se nahin hai
rishta hi miri pyaas kaa paani se nahin hai

yuun dard ne ummid ke laD se mujhe baandhaa
dariyaaon ko jis tarah kinaaraa kare koi