baDhti gaiin jafaaein jahaan raah-e-shauq mein — JaiKrishn Chaudhry Habeeb

bichhDe mujh se is tarah vo zindagi ke ham-safar
bujh gae hon jalte jalte jaise raste ke charaagh

'habib' khud hi banaaeinge roz-o-shab apne
huaa hi kyaa jo zamaane ne saath chhoD diyaa

har ik fasurda qalb pe chhaai shaguftagi
jab chhiD gai hai bazm mein us gul-badan ki baat

paa ke ik teraa tabassum muskuraai kaaenaat
jhuum uTThaa vo bhi dil jiine se jo bezaar thaa

yaa guftugu ho un lab-o-rukhsaar-o-zulf ki
yaa un khamosh nazron ke lutf-e-sukhan ki baat

nikhat vahi surur vahi dil-kashi vahi
aamad ye aap ki hai ki jhonkaa bahaar kaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

yuun to maujud apne ghar mein hai
aadmi mustaqil safar mein hai

safar mein aise kai marhale bhi aate hain
har ek moD pe kuchh log chhuT jaate hain

buraa bhalaa vaasta bahar-taur us se kuchh der to rahaa hai
kahin sar-e-raah saamnaa ho to itni shiddat se munh na moDun

safar rasta saubat khvaab sahraa
samundar vaahima khunaab sahraa