chaaron jaanib rachi hui hai ashkon ki bu-baas — Jamal Ehsani

isi ik baat par hai ittifaaq-o-ikhtilaaf us se
use aaina aur mujh ko piyaala achchhaa lagtaa hai

hazaar tarah ke the ranj pichhle mausam mein
par itnaa thaa ki koi saath rone vaalaa thaa

jo dil ke taaq mein tu ne charaagh rakkhaa thaa
na puchh main ne use kis tarah sitaara kiyaa

kisi bhi vaqt badal saktaa hai lamha koi
is qadar khush bhi na ho meri pareshaani par

vo log mere bahut pyaar karne vaale the
guzar gae hain jo mausam guzarne vaale the

vo bhi milne nai poshaak badal kar aayaa
main jo kal pairahan-e-khaak badal kar aayaa

kah do ye kohkan se ki marnaa nahin kamaal
mar mar ke hijr-e-yaar mein jiinaa kamaal hai

jaise dimak-zada koi lakDi
yuun tiraa hijr khaae jaataa hai

hijr ki raaton mein laazim hai bayaan-e-zulf-e-yaar
niind to jaati rahi hai qissa-khvaani kijiye

miri nazar mein vahi mohni si murat hai
ye raat hijr ki hai phir bhi khub-surat hai

tu kahaan jaaegi kuchh apnaa Thikaana kar le
ham to kal khvaab-e-adam mein shab-e-hijraan honge

aise hijr ke mausam kab kab aate hain
tere alaava yaad hamein sab aate hain