tu miri raah mein kyuun haail hai — Jameel Yusuf

dil jahaan le jaae dil ke saath jaanaa chaahiye
is se baDh kar aur koi rahnumaa hotaa nahin

ab to tere husn ki har anjuman mein dhuum hai
jis ne meraa haal dekhaa teraa divaana huaa

teri duuri bhi hai mushkil tiri qurbat bhi muhaal
kis qadar tu ne miri jaan sataayaa hai mujhe

teri duniyaa mein tire husn kaa shaidaai huun
ai khudaa mujh ko gunahgaar na samjhaa jaae

ai khudaa tu hi be-misaal nahin
main bhi huun kaaenaat mein tanhaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

barsaat kaa baadal to divaana hai kyaa jaane
kis raah se bachnaa hai kis chhat ko bhigonaa hai

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe

yuun to maujud apne ghar mein hai
aadmi mustaqil safar mein hai

safar mein aise kai marhale bhi aate hain
har ek moD pe kuchh log chhuT jaate hain