surat na yuun dikhaae unhein baar baar chaand — Javed Lakhnvi

khaak uD ke hamaari tire kuche mein pahunchti
taqdir thi ye bhi ki havaa bhi na chali aaj

kahin aisaa na ho mar jaaun main hasrat hi hasrat mein
jo lenaa ho to le lo sab se pahle imtihaan meraa

shab-e-vasl kyaa jaane kyaa yaad aayaa
vo kuchh aap hi aap sharmaa rahe hain

tum paas jo aae kho gae ham
jab tum na mile to justuju ki

tumhein hai nashsha javaani kaa ham mein ghaflat-e-ishq
na ikhtiyaar mein tum ho na ikhtiyaar mein ham

tum diye jaao yunhi ham ko havaa daaman ki
ham se behosh nahin hosh mein aane vaale

vo chaand hai to aks bhi paani mein aaegaa
kirdaar khud ubhar ke kahaani mein aaegaa

aasmaan jhaank rahaa hai 'khaalid'
chaand kamre mein mire utraa hai

chaand ne taan li hai chaadar-e-abr
ab vo kapDe badal rahi hogi

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

baat vo aadhi raat ki raat vo puure chaand ki
chaand bhi ain chait kaa us pe tiraa jamaal bhi

charaagh dafn kiye the 'nadim' qabron mein
zamin se chaand numudaar ho gae saahib