pyaar ki khud-farebiyaan tauba — Jazib Quraishi

mujh ko baDe khulus se barbaad kar diyaa
'jaazib' kisi ne ek havas-kaar ke liye

teri khushbu pyaar ke lahje mein bole to sahi
dil ki har dhaDkan ko ik chehra nayaa mil jaaegaa

mire vajud ke khushbu-nigaar sahraa mein
vo mil gae hain to mil kar bichhaD bhi sakte hain

daftar ki thakan oDh ke tum jis se mile ho
us shakhs ke taaza lab-o-rukhsaar to dekho

kuchh mere dhaDakte hue dil ne bhi pukaaraa
kuchh aap ko baazaar mein dhokaa bhi huaa hai

kyuun maang rahe ho kisi baarish ki duaaein
tum apne shikasta dar-o-divaar to dekho

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

thak gayaa hai dil-e-vahshi miraa fariyaad se bhi
ji bahaltaa nahin ai dost tiri yaad se bhi

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

husn jalva dikhaa gayaa apnaa
ishq baiThaa rahaa udaas kahin

tire ishq ki intihaa chaahtaa huun
miri saadgi dekh kyaa chaahtaa huun