'kaif' paidaa kar samundar ki tarah — Kaif Bhopali

chaahtaa huun phunk duun is shahr ko
shahr mein in kaa bhi ghar hai kyaa karun

kaise maanein ki unhein bhuul gayaa tu ai 'kaif'
un ke khat aaj hamein tere sirhaane se mile

mai-kasho aage baDho tishna-labo aage baDho
apnaa haq maangaa nahin jaataa hai chhinaa jaae hai

ham na piyeinge bhiik ki saaqi
le ye tiraa paimaana paDaa hai

kyaa koi mohabbat mein yuun bhi benaam-o-nishaan ho jaataa hai
main huun ki abhi tak zinda huun duniyaa hai ki bhuli jaati hai

mat dekh ki phirtaa huun tire hijr mein zinda
ye puchh ki jiine mein maza hai ki nahin hai

main baDaa ho gayaa huun magar bachpanaa
mere dil se kabhi bhi gayaa hi nahin

asar bhi le rahaa huun teri chup kaa
tujhe qaail bhi kartaa jaa rahaa huun

chup ho gae tere rone vaale
duniyaa kaa khayaal aa gayaa hai

hamesha ke liye khaamosh ho kar
nai tarz-e-fughaan vaale ne maaraa

aalam-e-masti mein mere munh se kuchh niklaa jo raat
bol uThaa tevari chaDhaa kar vo but-e-mai-khvaar chup

gung hain jin ko khamoshi kaa mazaa hotaa hai
dahan-e-zakhm mein khud qufl-e-hayaa hotaa hai