bahut udaas hain divaarein unche mahlon ki — Khan Hasnain Aqib

ji chaahtaa hai tark-e-mohabbat ko baar baar
aataa hai ek aisaa bhi lamha visaal mein

lafzon ke her-pher se banti nahin ghazal
sheron mein thoDi garmi-e-jazbaat bhi to ho

aur thoDaa saa bikhar jaaun yahi Thaani hai
zindagi main ne abhi haar kahaan maani hai

gham uThaataa huun ghazal kahtaa huun jiitaa rahtaa huun
log kahte hain ki ik din 'mir' ho jaaungaa main

kaTti hai shab visaal ki palkein jhapakte hi
jis ki subh na ho kabhi vo raat bhi to ho

garche halkaa saa dhundlakaa hai tasavvur bhi tiraa
band aankhon ko ye manzar bhi bahut lagtaa hai

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

pi jis qadar mile shab-e-mahtaab mein sharaab
is balghami-mizaaj ko garmi hi raas hai

aag se paani mein bujhte vaqt uThti hai sadaa
har koi darmaandagi mein naale se naa-chaar hai

gham ho ki khushi donon kuchh duur ke saathi hain
phir rasta hi rasta hai hansnaa hai na ronaa hai