nae manzar ke khvaabon se bhi Dar lagtaa hai un ko — Khushbir Singh Shaad

bhanvar jab bhi kisi majbur kashti ko Dubotaa hai
to apni bebasi par duur se saahil taDaptaa hai

ye teraa taaj nahin hai hamaari pagDi hai
ye sar ke saath hi utregi sar kaa hissa hai

'shaad' itni baDh gai hain mere dil ki vahshatein
ab junun mein dasht aur ghar ek jaise ho gae

yahi qatre banaate hain kabhi to ghaas par moti
kabhi shabnam ko ye simaab mein tabdil karte hain

rafta rafta sab tasvirein dhundli hone lagti hain
kitne chehre ek puraane album mein mar jaate hain

ab andheron mein jo ham khauf-zada baiThe hain
kyaa kahein khud hi charaaghon ko bujhaa baiThe hain

mere khvaabon ke jharokon ko sajaate rahiye
na sahi vasl magar yaad to aate rahiye

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

maang mein Taankne aayaa thaa sitaare koi
dil ko kyaa sujhi ki us khvaab ko bimaar kiyaa

abhi vo aankh bhi soi nahin hai
abhi vo khvaab bhi jaagaa huaa hai

kabhi dikhaa de vo manzar jo main ne dekhe nahin
kabhi to niind mein ai khvaab ke farishte aa