karim jo tujhe denaa hai be-talab de de — Meer Anees

aashiq ko dekhte hain dupaTTe ko taan kar
dete hain ham ko sharbat-e-didaar chhaan kar

tamaam umr jo ki ham se be-rukhi sab ne
kafan mein ham bhi azizon se munh chhupaa ke chale

'anis' aasaan nahin aabaad karnaa ghar mohabbat kaa
ye un kaa kaam hai jo zindagi barbaad karte hain

ashk-e-gham dida-e-pur-nam se sambhaale na gae
ye vo bachche hain jo maan baap se paale na gae

gul-dasta-e-maaani ko nae Dhang se baandhun
ik phuul kaa mazmun ho to sau rang se baandhun

'anis' dam kaa bharosaa nahin Thahar jaao
charaagh le ke kahaan saamne havaa ke chale

shaikh mujh ko na Daraa apni musalmaani thaam
ham faqiron kaa kisi rang se imaan na jaae

sajda huaa hamesha faqiron ke ilm par
ham aagahi pe marte hain poshaak par nahin

faqir log rahe apne apne haal mein mast
nahin to shahr kaa naqsha badal chukaa hotaa

dil de na de magar ye tiraa husn-e-be-misaal
vaapas na kar faqir ko aakhir badan to hai

vaah kyaa raah dikhaai hai hamein murshid ne
kar diyaa kaabe ko gum aur kalisaa na milaa

jannat-e-sufiyaa nisaar dahr ki musht-e-khaak par
aashiq-e-arz-e-paak ko daavat-e-laa-makaan na de