phuul kyaa Daaloge turbat par miri — Mubarak Azimabadi

kahaan qismat mein is ki phuul honaa
vahi dil ki kali hai aur ham hain

phir na darmaan kaa kabhi naam 'mubaarak' lenaa
kufr hai dard-e-mohabbat kaa mudaavaa karnaa

khair saaqi ki salaamat mai-kada
jis qadar pi utni hushyaari baDhi

khaTak rahi hai koi shai nikaal de koi
taDap rahaa hai dil-e-be-qaraar siine mein

na maanoge na maanoge hamaari
udhar ho jaaegi duniyaa idhar ki

teri bakhshish ke bharose pe khataaein ki hain
teri rahmat ke sahaare ne gunahgaar kiyaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

kahaan milegi misaal meri sitamgari ki
ki main gulaabon ke zakhm kaanTon se si rahaa huun

har zarra us ki chashm mein labrez-e-nur hai
dekhaa hai jis ne husn-e-tajalli bahaar kaa

ik shakl hamein phir bhaai hai ik surat dil mein samaai hai
ham aaj bahut sarshaar sahi par aglaa moD judaai hai

tum gae raunaq-e-bahaar gai
tum na jaao bahaar ke din hain