Wali Dakni

khub-ru khuub kaam karte hain

خوب رو خوب کام کرتے ہیں یک نگہ میں غلام کرتے ہیں دیکھ خوباں کوں وقت ملنے کے کس ادا سوں سلام کرتے ہیں کیا وفادار ہیں کہ ملنے میں دل سوں سب رام رام کرتے ہیں کم نگاہی سوں دیکھتے ہیں ولے کام اپنا تمام کرتے ہیں کھولتے ہیں جب اپنی زلفاں کوں صبح عاشق کوں شام کرتے ہیں صاحب لفظ اس کوں کہہ سکیے جس سوں خوباں کلام کرتے ہیں دل لجاتے ہیں اے ولیؔ میرا سرو قد جب خرام کرتے ہیں

muflisi sab bahaar khoti hai

مفلسی سب بہار کھوتی ہے مرد کا اعتبار کھوتی ہے کیونکے حاصل ہو مج کو جمعیت زلف تیری قرار کھوتی ہے ہر سحر شوخ کی نگہ کی شراب مجھ انکھاں کا خمار کھوتی ہے کیونکے ملنا صنم کا ترک کروں دلبری اختیار کھوتی ہے اے ولیؔ آب اس پری رو کی مجھ سنے کا غبار کھوتی ہے

tujh lab ki sifat laal-e-badakhshaan suun kahungaa

تجھ لب کی صفت لعل بدخشاں سوں کہوں گا جادو ہیں ترے نین غزالاں سوں کہوں گا دی بادشہی حق نے تجھے حسن نگر کی یو کشور ایراں میں سلیماں سوں کہوں گا تعریف ترے قد کی الف وار سریجن جا سرو گلستاں کوں خوش الحاں سوں کہوں گا مجھ پر نہ کرو ظلم تم اے لیلی خوباں مجنوں ہوں ترے غم کوں بیاباں سوں کہوں گا دیکھا ہوں تجھے خواب میں اے مایۂ خوبی اس خواب کو جا یوسف کنعاں سوں کہوں گا جلتا ہوں شب و روز ترے غم میں اے ساجن یہ سوز ترا مشعل سوزاں سوں کہوں گا یک نقطہ ترے صفحۂ رخ پر نئیں بے جا اس مکھ کو ترے صفحۂ قرآں سوں کہوں گا قربان پری مکھ پہ ہوئی چوب سی جل کر یہ بات عجائب مہ تاباں سوں کہوں گا بے صبر نہ ہو اے ولیؔ اس درد سوں ہرگز جلتا ہوں ترے درد میں درماں سوں کہوں گا

jise ishq kaa tiir kaari lage

جسے عشق کا تیر کاری لگے اسے زندگی کیوں نہ بھاری لگے نہ چھوڑے محبت دم مرگ تک جسے یار جانی سوں یاری لگے نہ ہووے اسے جگ میں ہرگز قرار جسے عشق کی بے قراری لگے ہر اک وقت مجھ عاشق پاک کوں پیارے تری بات پیاری لگے ولیؔ کوں کہے تو اگر یک بچن رقیباں کے دل میں کٹاری لگے

yaad karnaa har ghaDi us yaar kaa

یاد کرنا ہر گھڑی اس یار کا ہے وظیفہ مجھ دل بیمار کا آرزوئے چشمۂ کوثر نئیں تشنہ لب ہوں شربت دیدار کا عاقبت کیا ہووے گا معلوم نئیں دل ہوا ہے مبتلا دل دار کا کیا کہے تعریف دل ہے بے نظیر حرف حرف اس مخزن اسرار کا گر ہوا ہے طالب آزادگی بند مت ہو سبحہ و زنار کا مسند گل منزل شبنم ہوئی دیکھ رتبہ دیدۂ بے دار کا اے ولیؔ ہونا سریجن پر نثار مدعا ہے چشم گوہر بار کا

mat ghusse ke sho'le suun jalte kuun jalaati jaa

مت غصے کے شعلے سوں جلتے کوں جلاتی جا ٹک مہر کے پانی سوں تو آگ بجھاتی جا تجھ چال کی قیمت سوں دل نئیں ہے مرا واقف اے مان بھری چنچل ٹک بھاؤ بتاتی جا اس رات اندھاری میں مت بھول پڑوں تجھ سوں ٹک پاؤں کے جھانجھر کی جھنکار سناتی جا مجھ دل کے کبوتر کوں باندھا ہے تری لٹ نے یہ کام دھرم کا ہے ٹک اس کو چھڑاتی جا تجھ مکھ کی پرستش میں گئی عمر مری ساری اے بت کی پجن‌ ہاری ٹک اس کو پجاتی جا تجھ عشق میں جل جل کر سب تن کوں کیا کاجل یہ روشنی افزا ہے انکھیاں کو لگاتی جا تجھ نیہ میں دل جل جل جوگی کی لیا صورت یک بار اسے موہن چھاتی سوں لگاتی جا تجھ گھر کی طرف سندر آتا ہے ولیؔ دائم مشتاق درس کا ہے ٹک درس دکھاتی جا