hadis-e-dil ba-zabaan-e-nazar bhi kah na sakaa — Muhammad Ayyub Zauqi

rakhte hain jo allaah ki qudarat pe bharosa
duniyaa mein kisi ki vo khushaamad nahin karte

raaste mein mil gae to puchh lete hain mizaaj
is se baDh kar aur kyaa un ki inaayat chaahiye

khudaa jaane ye soz-e-zabt hai yaa zakhm-e-naakaami
kabhi hoti na thi siine mein lekin ye jalan pahle

un ki nigaah-e-lutf ki taasir kyaa kahun
zarre ko aaftaab banaa kar chale gae

duniyaa ke is ibrat-khaane mein haalaat badalte rahte hain
jo log the kal mashhur-e-jahaan hain aaj vahi gumnaami mein

vajh-e-sukun na ban sakin husn ki dil-navaaziyaan
baDh gaiin aur uljhanein tum ne jo muskuraa diyaa

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

badalte vaqt ne badle mizaaj bhi kaise
tiri adaa bhi gai meraa baankpan bhi gayaa

jafaa par nahin jab vo dil hi mein naadim
nazar se nadaamat kaa izhaar kyuun ho

kabhi karnaa ho andaaza jab apne dard kaa mujh ko
main us bedard ke dil ko dukhaa kar dekhaa letaa huun

apne andaaz-e-takallum ko badal de varna
meraa lahja bhi tire saath badal saktaa hai