unhein khudaa kaa amal sharmsaar kar degaa — Muhammad Ayyub Zauqi

rakhte hain jo allaah ki qudarat pe bharosa
duniyaa mein kisi ki vo khushaamad nahin karte

raaste mein mil gae to puchh lete hain mizaaj
is se baDh kar aur kyaa un ki inaayat chaahiye

hadis-e-dil ba-zabaan-e-nazar bhi kah na sakaa
huzur-e-husn baDhi aur bebasi meri

khudaa jaane ye soz-e-zabt hai yaa zakhm-e-naakaami
kabhi hoti na thi siine mein lekin ye jalan pahle

un ki nigaah-e-lutf ki taasir kyaa kahun
zarre ko aaftaab banaa kar chale gae

duniyaa ke is ibrat-khaane mein haalaat badalte rahte hain
jo log the kal mashhur-e-jahaan hain aaj vahi gumnaami mein

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

dimaagh un ke tajassus mein jism ghar mein rahaa
main apne ghar hi mein rahte hue safar mein rahaa

safar mein aise kai marhale bhi aate hain
har ek moD pe kuchh log chhuT jaate hain

yaad aai hai to phir TuuT ke yaad aai hai
koi guzri hui manzil koi bhuli hui dost

umr-bhar jis ke liye aankhein rahi hain farsh-e-raah
vo ajal kaa qaasid-e-farkhanda-gaam aa hi gayaa