shikasta-haal saa be-aasraa saa lagtaa hai — Muneer Niyazi

ik tez raad jaisi sadaa har makaan mein
logon ko un ke ghar mein Daraa denaa chaahiye

sukhan mein sahl nahin jaan nikaal kar rakhnaa
ye zindagi hai hamaari sambhaal kar rakhnaa

shaayad ki khudaa mein aur mujh mein
ik jast kaa aur faasla hai

tum ham-safar hue to hui zindagi aziiz
mujh mein to zindagi kaa koi hausla na thaa

jis ko milnaa nahin phir us se mohabbat kaisi
sochtaa jaaun magar dil mein basaae jaaun

laai hai ab uDaa ke gae mausamon ki baas
barkhaa ki rut kaa qahr hai aur ham hain dosto

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

chal diye su-e-haram ku-e-butaan se 'momin'
jab diyaa ranj buton ne to khudaa yaad aayaa

kabhi ham mein tum mein bhi chaah thi kabhi ham se tum se bhi raah thi
kabhi ham bhi tum bhi the aashnaa tumhein yaad ho ki na yaad ho

yaad us but ki namaazon mein jo aai mujh ko
tapish-e-shauq se har baar mein baiThaa uTThaa

jhuTi baatein mujhe yaad aaiin jo us ki shab-e-hijr
subh-e-kaazib ko main peshaani-e-qaatil samjhaa