maanaa ki teraa mujh se koi vaasta nahin — Murtaza Barlas

dushman-e-jaan hi sahi dost samajhtaa huun use
bad-duaa jis ki mujhe ban ke duaa lagti hai

mujhe ki gai hai ye peshkash ki sazaa mein hongi riyaayatein
jo qusur main ne kiyaa nahin vo qubul kar luun dabaao mein

naam is kaa aamariyyat ho ki ho jamhuriyat
munsalik firauniyat masnad se tab thi ab bhi hai

chehre ki chaandni pe na itnaa bhi maan kar
vaqt-e-sahar tu rang kabhi chaand kaa bhi dekh

chaltaa rahe jo aabla-paai ke baavajud
manzil kaa mustahiq vahi sahraa-navard hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

kyon tasavvur mein ji rahaa huun main
jab haqiqat mein mar hi jaanaa hai

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

jab talak shisha rahaa main baar-haa toDaa gayaa
ban gayaa patthar to sab ne devtaa maanaa mujhe

kuchh phulon ki khaatir bhi kuchh phulon kaa
sab se achchhaa rang churaanaa paDtaa hai

ghurur bhi jo karun main to aajizi ho jaae
khudi mein lutf vo aae ki be-khudi ho jaae