mujh pe khultaa na kabhi lafz-e-mohabbat main ne — Noman Badr

main kaaTaa jaaungaa sab ko 'aziz hote hue
saDak ke biich mein aayaa huaa darakht huun main

ye lamha jis mein ham aaj chhup kar gale mile hain
agar muqaddar nahin milaa to sazaa banegaa

ham ko khushiyaan bhi udaasi ke lifaafe mein milin
ham saa bad-bakht zamaane mein nahin hai koi

lafz-e-ehsaas ko tasvir nahin kar sakte
'ishq duniyaa ki zabaanon se baDaa hai shaayad

ghol ke ghol mire sahn mein aa baiThte hain
ye parinde mujhe hijrat nahin karne dete

hamaare baa'd bhi tum qahqahe lagaate ho
tumhaare baa'd to ham baat bhi nahin karte

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

ham jurm-e-mohabbat ki sazaa paaeinge tanhaa
jo tujh se hui ho vo khataa saath liye jaa

sitaare is qadar dekhe ki aankhein bujh gaiin apni
mohabbat is qadar kar li mohabbat chhoD di ham ne

is dil mein chubhaa rahtaa thaa kaanTe ki tarah vo
ik roz use main ne mohabbat se nikaalaa

dard-e-ulfat zindagi ke vaaste iksir hai
khaak ke putle isi jauhar se insaan ho gae