barbaad-e-vafaa ho kar masjud-e-jahaan dil ho — Nooh Narvi

dil unhein deinge magar ham deinge in sharton ke saath
aazmaa kar jaanch kar sun kar samajh kar dekh kar

jab zikr kiyaa main ne kabhi vasl kaa un se
vo kahne lage paak mohabbat hai baDi chiiz

vo haath mein talvaar liye sar pe khaDe hain
marne nahin deti mujhe marne ki khushi aaj

jo ahl-e-zauq hain vo lutf uThaa lete hain chal phir kar
gulistaan kaa gulistaan mein bayaabaan kaa bayaabaan mein

koi yahaan se chal diyaa raunaq-e-baam-o-dar nahin
dekh rahaa huun ghar ko main ghar hai magar vo ghar nahin

nuuh baiThe hain chaarpaai par
chaarpaai pe nuuh baiThe hain

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

Tapakte hain shab-e-gham dil ke TukDe dida-e-tar se
sahar ko kaise kaise phuul chuntaa huun main bistar se

fikr-e-manzil hai na hosh-e-jaada-e-manzil mujhe
jaa rahaa huun jis taraf le jaa rahaa hai dil mujhe

khabar tak ho nahin paati kisi ko
vo yuun dil ke dariche kholtaa hai

gar tujh mein hai vafaa to jafaakaar kaun hai
dil-daar tu huaa to dil-aazaar kaun hai