aa jaaein vaqt-e-naza to main un ko dekh luun — Nwab Saif Ali Sayyaf

milnaa kaisaa ki yaad bhi na kiyaa
mere naalon kaa kuchh asar na huaa

mere naalon ki jo aavaaz pahunch jaati hai
ghar se baahar nikal aate hain pareshaan ho kar

khudaaraa ik nigaah-e-naaz hi se dekh lo ham ko
garebaan phaaDne ko aaj ham tayyaar baiThe hain

junun-e-mohabbat ne ye din dikhaayaa
ki duniyaa mein rusvaa huaa chaahtaa huun

thi dard ki jab tak dil mein khaTak hiltaa thaa falak larzaan thi zamin
ham aahein jis dam bharte the ik mahshar barpaa hotaa thaa

parde mein vo to chhup gae dikhlaa ke ik jhalak
main pech-o-taab mein rahaa din bhar tamaam raat

main baDaa ho gayaa huun magar bachpanaa
mere dil se kabhi bhi gayaa hi nahin

badalte vaqt ne badle mizaaj bhi kaise
tiri adaa bhi gai meraa baankpan bhi gayaa

'saif' andaaz-e-bayaan rang badal detaa hai
varna duniyaa mein koi baat nai baat nahin

shahr ki galiyon mein gahri tirgi giryaan rahi
raat baadal is tarah aae ki main to Dar gayaa

haath mein chaand jahaan aayaa muqaddar chamkaa
sab badal jaaegaa qismat kaa likhaa jaam uThaa

chor aisaa mukhbir aisaa chaahiye
mujh ko dilbar kaa pataa dil se milaa